ʻŌLELO HOʻOHOLO
No. 2017 – 6
HE HO‘OMANA‘O KĒIA IĀ KUPUNA WILLIAM KALIKOLEHUA PĀNUI A KE HO‘ŌHO ‘IA AKU NEI KONA ‘IKENA PIHA OLA A WAIWAI HO‘I HE KUMU NOHONA HAWAI’I O KO KĀKOU LĀHUI
ʻOIAI, ua hānau ʻia ʻo William Kalikolehua Pānui ma ka Nowemapa 16, 1928 a hānai ʻia na Louis Kauanoekauikalikokahalaopuna Pānui lāua ʻo Annie Kahalulu Kauhi-Pānui ma Keʻei, Kona, Hawaiʻi; a
ʻOIAI, he mamo ʻo ia na Kekūhaupiʻo, ke kumu a Kamehameha, ua pūkaua ʻo ia ma nā kaua Kōlea me Viekanama; a
ʻOIAI, ua hānai ʻia kona ʻohana ma Kāneʻohe: kāna mau keikikāne ʻo William J. lāua ʻo Ellery; ʻo kāna mau kaikamāhine ʻo Bonnie lāua ʻo Julie; a
ʻOIAI, ua hana ʻo ia ma Hawaiian Dredging, Oʻahu Transit Service, Servco Hawaiʻi, a ma Nā Kula ʻo Kamehameha; a
ʻOIAI, he kanaka haipule ʻo ia i ka Haku, ua noho ʻo ia i kiakona, i kumu ʻeuanelio, a ma nā kūlana lawelawe ʻē aʻe ma ka hale pule ʻo Kawaiahaʻo a ma Kahikolu ma kona ʻāina aloha ʻo Keʻei; a
ʻOIAI, he mānaleo hope loa ʻo ia no Keʻei, ua aʻo i kona ʻike o ka ʻōlelo, ua unuhi i nā nūpepa me nā palapala, a ua haku mele a ʻo kekahi mele, ʻo “Ke Alaula,” kekahi i loaʻa ka Hōkū Hanohano; a
ʻOIAI, he kanaka mālama moʻokūʻauhau, he kūʻauhau a he kahu ʻo ia no ka ʻāina o Keʻei me Nāpoʻopoʻo a he haʻi moʻolelo ʻo ia o nā moʻolelo o ia ʻāina kaulana no Kamehameha a me ke Kulanui o Hawaiʻi; a
ʻOIAI, he kumu aʻo kīhōʻalu a me ka pūolo Hawaiʻi ma ka Hālau Mele no ka ʻAhahui Pūolo Hawaiʻi ma ke kula ʻo Kana Lui ma Kalaepōhaku, a he kauleo ʻo ia i nā puʻukani a i nā kumu hula like ʻole; a
ʻOIAI, ʻo William Panui he lālā kūola a lālā kū mua ho‘i o ka Hui Sīwila Hawai’i ‘o Kuini Pi‘olani a he lālā nō ho‘i ‘o ia o ka ‘Ahahui ‘ōlelo Hawai’i; a
ʻOIAI, ke waiho nei ʻo ia i hoʻoilina e hoʻomau: ʻo kāna wahine ʻo Namahana; ʻo kona kaikaina ʻo Kunia Kamealoha; ʻo kāna mau keiki i kapa ʻia ai ma luna; nā kani moʻopuna a me nā keiki a me nā moʻopuna hānai a hoʻokama he nui ʻino.
NO LAILA, E HO‘OHOLO ‘IA E ka ‘Ahahui Sīwila Hawai‘i e ākoakoa nei ma kona ‘Aha Nui 58 ma Seattle, Washington, i ke kau ʻana o Māhealani ma ka malama ʻo ʻIkuwā, ma kēia lā 4 o Nowemapa 2017, he ho‘omana‘o kēia iā kupuna William Kalikolehua Pānui a ke ho‘ōho ‘ia aku nei kona ‘ikena piha ola a waiwai ho‘i he kumu nohona Hawai‘i o ko kākou lāhui; a
NO LAILA, E HOʻOHOLO HOU ʻIA e ho‘ouna ‘ia aku nēia ‘ōlelo ho‘oholo i ka ‘ohana o William Kalikolehua Pānui i hala, a i ka ‘Ahahui ‘Ōlelo Hawai‘i, pēia pū me ke Kiaʻāina o ka Mokuʻāina ʻo Hawaiʻi, ka Luna Ho‘omalu o Ka ‘Aha Kenekoa Hawai‘i, ka Luna Ho‘omalu o ka Hale o Nā Luna Maka‘āinana o Hawai‘i, ka Luna Ho‘omalu o ke Kōmike Kuleana Hawai‘i o ka ‘Aha Kenekoa Hawai‘i, ka Luna Ho‘omalu o ke Kōmike Kuleana Hawai‘i o ka Hale o Nā Luna Maka‘āinana o Hawai‘i, ka Luna Ho ‘omalu o Ka Papa Kahu Waiwai o ke Keʻena Kuleana Hawaiʻi, a nā Meia o nā Kalana o Hawai‘i.
Ua hō‘oia ‘ia e ka mea pūlima o lalo iho nei ka ho‘āpono ‘ia o ka ‘ōlelo ho‘oholo, i ke kau ʻana o Māhealani ma ka malama ʻo ʻIkuwā, ma ka lā 4 o Nowemapa 2017, ma ka ‘Aha Kū Makahiki Kanalimakūmāwalu o ka ‘Ahahui Sīwila Hawai‘i ma Seattle, Washington.
Annelle C. Amaral, Pelekikena