.category-resolution .post-meta { display:none; }

ASSOCIATION OF HAWAIIAN CIVIC CLUBS

A RESOLUTION

No. 2018 – 42

E PAIPAI ANA I KA ʻAHAʻŌLELO O KA MOKUʻĀINA O HAWAIʻI E HOʻOKUMU I HUI KULEANA HOʻOKELE MAUNA KEA

ʻOIAI, ua nui ke kūkā kamaʻilio a kālailai ʻana no ka hoʻokāʻoi ʻana i ke kahu ʻia ʻo Mauna Kea; a

ʻOIAI, he mea koʻikoʻi ke ʻano o ke kamaʻilio ʻana me ke kaiāulu i mea e hua pono ai he ala e kūkulu ʻia he kino, he ʻōnaehana a he mau kaʻinahana hou e kahu pono ai ‘o Mauna Kea; a

ʻOIAI, ʻo ke ala kaʻaʻike a ʻimi hoʻokāʻoi , he mea e hoʻomau ʻia; a

ʻOIAI he hui kahu mauna hou ke ala i ʻike ʻia he ala kūpono e hoʻoponopono ʻia ai nā hihia nui i ʻike mua ʻia, a e ʻike ʻia nei ma Mauna Kea; a

ʻOIAI, he hui hou ka mea e hoʻonui ʻia ai ke ahuwale o ke kō a kō ʻole paha o nā koina i kau ʻia ma luna o nā moho hoʻolimalima ma Mauna Kea, a i mea e maopopo leʻa ai lākou i nā kuleana a kaumaha i ʻae ʻia mai; a

ʻOIAI, no kēia hui ke kuleana o ke kahuaola ʻana i ka hoʻohana pono ʻia ʻana o Mauna Kea me ka loaʻa mai ia hoʻohana ʻia ʻana; a

ʻOIAI, aia ana nō ke keʻena o kēia hui ma ka mokupuni ʻo Hawaiʻi a no lākou ke kuleana hoakaʻaʻike no ka lehulehu a me ka Mokuʻāina no ka piko o Mauna Kea me nā hale ma kahi waena o Mauna Kea; a

ʻOIAI, e alakaʻi ʻia ana kēia hui e kekahi papa alakaʻi nona nā lālā i hihia ʻole no Mauna Kea me ke kaʻawale, akāka o ka noʻonoʻo, ka mākaukau, ʻike, me ke kākoʻo a makemake e pili i ia hui hou no ka hoʻokō ʻana i nā pahuhopu; a

ʻOIAI, e hoʻohana ʻia ana ka hualoaʻa o ia hui no ke kahu a mālama pono ʻana i nā ʻeka ʻumikūmākahi kaukani ʻehā haneli i ʻoi a emi mai paha a kēia hui e hoʻoholo ai; a

ʻOIAI, no kēia hui hou ke kuleana a mana kahu a mālama iā Mauna Kea ma mua o nā hui e ʻauamo nei i ia mau kuleana i kēia Manawa; a

NO LAILA, E HO‘OHOLO ‘IA E ka ‘Ahahui Sīwila Hawai‘i e ākoakoa nei ma kona ‘Aha Nui 59 ma Kalapaki, Kauaʻi, ma ka malama ʻo Welehu me ka piʻina ʻo ʻOlepau, ma ka lā 17 o Nowemapa 2018, e paipai ana i ka ʻahaʻōlelo o ka mokuʻāina ʻo Hawaiʻi e hoʻokumu i hui kuleana hoʻokele Mauna Kea; a

NO LAILA, E HOʻOHOLO HOU ʻIA no ka Hui Kuleana Hoʻokele Mauna Kea Authority ke kuleana haku i nā kulekele komo, kahu, a mālama hoʻi i nā ʻāina ma Mauna Kea, e helu pū ʻia ana a maʻō aku pū nā kulekele hoʻomalu i nā kumu waiwai a kūlohelohe, nā mea kuʻuna Hawaiʻi, nā hana hoʻonanea a pau, a me ka hoʻohana ʻoihana ʻia ʻana a pau loa; a

NO LAILA, E HOʻOHOLO HOU ʻIA he ʻeiwa lālā manakoho o ka Authority e hoʻokohu ʻia e ke Kiaʻāina mai kekahi papainoa moho kū i nā koina e hāʻawi ʻia i ke kiaʻāina; a

NO LAILA, E HOʻOHOLO HOU ʻIA e helu pū ʻia kēia mau lālā ma ka Authority penei, 1) ʻElua ʻōiwi Hawaiʻi e mau nei ka hana kuʻuna ma Mauna Kea a he moʻokūʻauhau o nā kūpuna i mālama i nā hana kuʻuna ma Mauna Kea; 2) He ʻōiwi Hawaiʻi mākaukau ma kekahi o nā loina a hana kuʻuna a paʻa ka mōʻaukala Hawaiʻi; 3) He ʻōiwi Hawaiʻi mākaukau loa ma ka hoʻonaʻauao Hawaiʻi ma nā pae kula kamaliʻi, haʻahaʻa, kiʻekiʻe a kulanui paha i puka me kekahi ʻano kēkelē ma ka hoʻonaʻauao a ʻumi a ʻoi aʻe makahiki hana ma ka ʻOihana Hoʻonaʻauao Hawaiʻi a ka ʻōnaehana Kulanui o Hawaiʻi paha; 4)He ʻōiwi Hawaiʻi ma ka mākaukau pāʻoihana, mālama kālā, ʻoihana kālā, hoʻokele waiwai, a i ʻole ka hakuhia nona 10 a ʻoi makahiki hana ma ka mokuʻāina ʻo Hawaiʻi; 5) He loea o ka honuaola e ʻike ʻia ai ia mākaukau o ia ʻepekema ma ka pili i nā kumu waiwai kūlohelohe me nā kaiaola o Mauna Kea, me ka loaʻa o ke kēkelē kulanui ma ke kālaimeaola, ke kālaikaiaola, a kekahi mea i pili i ia ʻano hana a i ʻole paha ka mōʻaukala hana e ahuwale ai ka ʻike no nā kumuwaiwai kūlohelohe me ke kaiaola o Mauna Kea; 6) He kilolani mākaukau nona kekahi kēkelē kulanui ma ke kilolani a “astrophysics” paha e hana ʻole nei ma kekahi hale kilolani i pili iā Mauna Kea a University of Hawaiʻi Institute for Astronomy paha; 7) He kanaka pāʻoihana i mākaukau ma ka mālama kālā, ʻoihana kālā, hoʻokele waiwai a hakuhia paha nona kekahi kēkelē kulanui ma ka hoʻokele pāʻoihana; 8)He kanaka mākaukau ma ka hoʻokele ʻāina i ʻike ʻia ai kona mākaukau ma ka waiwai paʻa, hoʻoholo waiwai ʻāina, a me nā ʻaelike, me ke maopopo i nā kānāwai hoʻohana ʻāina o Hawaiʻi; a

NO LAILA, E HOʻOHOLO HOU e noho hoʻi nā lālā o ka Authority ma ke kalana ʻo Hawaiʻi; a e koho kūmakahiki paha ka Authority i ka Luna Hoʻomalu a me ka Hope Luna Hoʻomalu mai loko mai o nā lālā; a e hoʻokele ʻia ka hana o kēlā me kēia lā e ka luna hoʻomalu; a

NO LAILA, E HOʻOHOLO HOU ʻIA ʻo ke kiʻi pāʻoihana o ka Authority e helu ʻia 6 mahale ma ka liʻiliʻi loa penei: Hoʻomalu Kānāwai, Ka moʻomeheu Hawaiʻi me ke kaiaulu, Ka Hoʻokele Loaʻa, Nā ʻŌnaehana Kākoʻo, Ke Kū Kānāwai, Ka Pilina Kaiaulu; a

NO LAILA, E HOʻOHOLO HOU ʻIA e hoʻokumu ʻia ke Kōmike Aʻoaʻo Moho Mauna Kea no ka Authority no ka paikomo ʻana, ka loiloi ʻana, a me ka hōʻike ʻana i ke Kiaʻāina i nā moho kū i nā koina no nā noho hakahaka o ka Authority; a

NO LAILA, E HOʻOHOLO HOU ʻIA he 12 lālā manakoho o ke Kōmike Aʻoaʻo Moho Mauna Kea e hoʻokohu ʻia ʻana me ka nānā ʻole ʻia ʻana o ka mahele 26-34, Hawai Revised Statutes penei: 1) Ka ʻelele o ka Mokupuni ʻo Hawaiʻi ma ka Papa Kahu Waiwai o ke Keʻena Kuleana Hawaiʻi; 2) Ka ʻelele o ka Mokupuni ʻo Hawaiʻi ma ke Kōmikina o ka ʻAina Hawaiʻi ma ke kuapo ʻia o ia kuleana ma waena o ka ʻelele no Hawaiʻi Hikina me Hawaiʻi Komohana,

3) Ka Luna Mokuna o ka papahana Kilolani ma ke Kulanui o Hawaiʻi ma Hilo; 4) Ka Luna Hoʻokele o ʻImiloa; 5) Ka ʻelele o ka Mokupuni ʻo Hawaiʻi ma ke Komike Aʻoaʻo o ka ʻAha Moku; 6) He ʻelele mai ka Royal Order of Kamehameha I, Moku o Māmalahoa Heiau; 7) Ka Pelekikena a i ʻole kāne pani mai ka Hawaiʻi Island Chamber of Commerce; 8) Ka Luna Hoʻomalu o ka Sierra Club, Moku Loa Group, a i ʻole kāna pani; 9) He ʻelele mai nā hale kilolani ma Mauna Kea; 9) Ka Pelekikena o ka Hawaiʻi Island Conractors Association, a i ʻole hoʻi kona pani; 10) He ʻelele mai ka Edith Kanakaʻole Foundation; 11) Ka ʻelele no ka Mokupuni ʻo Hawaiʻi ma ka Papa Alakaʻi o ka ʻOihana Kumuwaiwai ʻĀina; a

E HOʻOHOLO HOU ʻIA e hana ke Kōmike Aʻoaʻo Moho Mauna Kea penei:

1) E hoʻomohala a hoʻohana kekahi ʻōnaehana wae kaulike no ka loiloi ʻana i nā moho; 2) E paikomo a ʻae i nā palapala noi mai nā moho;

3) Loiloi i nā moho ma ka nānā ʻana i kā lākou hana a me ka papaha o ka hiki ke hoʻokō i nā kulena;

4) E mālama i ka ʻōnaehana koho pāloka hūnā no ke koho ʻana i nā moho no ka papa inoa no ka Authority;

5) E hāʻawi ʻekolu moho no kēlā me kēia noho hakahaka;

NO LAILA E HOʻOHOLO HOU ʻIA e hoʻomaka paha ke Kōmike Aʻoaʻo Moho Mauna Kea i ka paikomo, a loiloi i nā moho no kēlā me kēia hakahaka ma ka Authority ma loko o ke kanaono lā e hakahaka ai a i ʻole he hoʻokahi haneli iwakālua lā ma mua o ka pau ʻana o ke kau o ka lālā ma ka Authority; a

NO LAILA E HOʻOHOLO HOU ʻIA e hui nō ke Kōmike Aʻoaʻo Moho Mauna Kea hoʻokahi manawa o ka makahiki a ma ʻō aku inā pono; a

NO LAILA E HOʻOHOLO HOU ʻIA e hoʻouna hoʻi ka Authority i kekahi moʻolelo i ka ʻAhaʻōlelo 10 lā ma ka lohi loa ma mua o ka hui ʻana o ke Kau ʻahaʻolelo; a

NO LAILA E HOʻOHOLO HOU ʻIA nā kumuhana nui o ia moʻolelo no ke kūlana o nā Administrative rules, me nā kulekele hoʻomalu, hoʻokele, a kahu ʻana i nā ʻāina o Mauna Kea me kona mau kumuwaiwai kuʻuna; a

NO LAILA, E HOʻOHOLO HOU ʻIA e hoʻouna ʻia aku nēia ʻōlelo hoʻoholo i ka Kenekoa Kaialiʻi Kahele, Pelekikena – ʻAhahui Siwila ʻo Ke Aloha ʻAina, pēia pu me ke Kiaʻāina o ka Mokuʻāina ʻo Hawaiʻi, ka Luna Hoʻomalu o ka ʻAha Kenekoa Hawaiʻi, ka Luna Hoʻomalu o ka Hale o nā Luna Makaʻāinana o Hawaiʻi, ka Luna Hoʻomalu o ke Kōmike Kuleana Hawaiʻi o ka ʻAha Kenekoa Hawaiʻi, ka Luna hoʻomalu o ke Kōmike Kuleana Hawaiʻi o ka Hale o Nā Luna Makaʻāinana o Hawaiʻi, ka Luna hoʻomalu o ka Papa Kahu Waiwai o ke Keʻena Kuleana Hawaiʻi, a me nā Meia o nā Kalana o Hawaiʻi.

 Ua hō‘oia ‘ia e ka mea pūlima o lalo iho nei ka ho‘āpono ‘ia o ka ‘ōlelo ho‘oholo, i ke kau ʻana o Welehu ma ka malama ʻo ʻOlepau, ma ka lā 17 o Nowemapa 2018, ma ka ‘Aha Kū Makahiki Kanalimakūmāiwa o ka ‘Ahahui Sīwila Hawai‘i ma Kalapaki, Kaua‘i.

Annelle C. Amaral, President