2018-41OH

ASSOCIATION OF HAWAIIAN CIVIC CLUBS

A RESOLUTION

No. 2018 – 41

E PAIPAI ANA I KA ʻAHAʻŌLELO O KA MOKUʻĀINA O HAWAIʻI E NOI I KA LUNA HŌʻOIA MOKUʻĀINA E HŌʻOIA KŪHELU I KA HANA A KE KULANUI O HAWAIʻI E PILI ANA I KA LĀKOU HANA LIKE ʻOLE MA MAUNA KEA

ʻOIAI, ʻo Mauna Kea he ʻāina laʻa i ka Hawaiʻi ʻōiwi; a

ʻOIAI, ʻo Mauna Kea kahi koʻikoʻi loa ma ka honua a puni no ka ʻoihana kilo hōkū; a

ʻOIAI, ʻo Mauna Kea ka hiapo a Papa lāua ʻo Wākea, a ʻo ia hoʻi ʻo Mauna Kea ka hiapo a ʻo kākou Hawaiʻi kona mau pōkiʻi; a

ʻOIAI, ʻo ke panepoʻo kahi e pili ai ʻo Mauna Kea i ka lani, he piko hoʻi e pili ai i nā kūpuna o ka wā i hala ma o ka pilina e mau ai ka piliʻuhane, ka moʻokūʻauhau a me pilina ō mau; a

ʻOIAI, ʻo ka wao akua, no nā akua nō ia; a

ʻOIAI, he wahi koʻikoʻi a pili ʻuhane ke kualono o Mauna Kea i lako i nā pana ʻāina, ka wao akua, a me nā kaiā ʻalapaina hoʻi i piha i nā kumuwaiwai a me nā mea ola a koehana i loaʻa ʻole ma kekahi wahi hou aku a puni ka honua; a

ʻOIAI, he kuleana ia o kākou a pau ke kūpale a mālama ʻana iā Mauna Kea ma o ke alakaʻi kūpono ʻia ʻana; a

ʻOIAI, mai ka makahiki 1998, ua hōʻike ʻia ma nā hōʻoia kūhelu ʻehā i mālama ʻia na ka Luna Hōʻoia Mokuʻāina, ka hopohopo no ke ʻano o ka mālama, manakia, a kūpale ʻia o Mauna Kea; a

ʻOIAI, i loko nō o nā loli nui i hana ʻia ma Mauna Kea mai ka makahiki 1998; ua emi ka nui ka hilinaʻi o ko Hawaiʻi poʻe i ka mālama kūpono ʻia o Mauna Kea no ka nui o nā hewa i ʻike ʻia ma nā makahiki 50 i hala iho nei, ua ʻike ʻia ka pono e mālama hou ʻia he hōʻoia kūhelu i nā hana a ke Kulanui o Hawaiʻi e pili ana i kā lākou hana ma Mauna Kea.

NO LAILA, E HO‘OHOLO ‘IA E ka ‘Ahahui Sīwila Hawai‘i e ākoakoa nei ma kona ‘Aha Nui 59 ma Kalapaki, Kauaʻi, ma ka malama ʻo Welehu me ka piʻina ʻo ʻOlepau, ma ka lā 17 o Nowemapa 2018, e paipai ana i ka ʻAha Ōlelo o ka Mokuʻāina o Hawaiʻi e noi o ka Luna Hōʻoia e hōʻoia kūhelu i ka hana a ka Kulanui o Hawaiʻi e pili ana i ko lākou hana like ʻole ma Mauna Kea; a

NO LAILA, E HOʻOHOLO HOU ʻIA e komo pū ma ka hōʻoia kūhelu:

1. He hōʻoia kālā o ko ka Office of Mauna Kea Management, e hōʻoia ana i ka loaʻa a me ka lilo, ka pūʻulu kālā “Mauna Kea lands management special fund”, nā ʻoihana hoʻomākaʻikaʻi , a me nā kumu waiwai i hoʻokuleana ʻia mai ka University of Hawaii at Hilo no nā limahana a me ka mālama ʻana i ka ʻoihana mai ka makahiki 2010 a i ka makahiki 2017;
2. He hōʻoia kūhelu i ka Research Corporation of the University of Hawaii, e pili ana i ka “Mauna Kea observatory support services”, ka “Mauna Kea observatories”, a me nā haʻawina kālā, ka loaʻa me nā lilo, a me ka hoʻolako ʻuku ʻana i nā limahana no ia mau hana kākoʻo, me ka hōʻoia ʻana i ka holo a koho kūpono ʻana o ua ʻoihana ala;
3. He hōʻoia kūhelu o ka ʻōnaehana o ka University of Hawaii, e pili ana i ka hana pili kānāwai a me ke keʻena “university general counsel” e pili ana i:
   1. Nā loaʻa a lilo mai ka makahiki 2010 i pili i ka pūʻulu kālā “research and training revolving fund”, i pili iā Mauna Kea; a
   2. Nā Palapala Hoʻokuleana no nā ʻenehana ʻepekema i pili i nā hale kilolani kauʻāina a me ka “University of Hawaii Institute for Astronomy” i hua mai ma o ka hana kilohōkū a ʻimiloa i hana ʻia ma Mauna Kea; a
4. He hōʻoia kūhelu i ka pilina alakaʻi o nā hui aupuni a aupuni ʻole i loaʻa no lākou kekahi kuleana ma ka hoʻoholo ʻana no Mauna Kea, a me ka hōʻoia ʻana i ka holo a koho kūpono ʻana o ua mau ʻoihana ala, a me ka paʻa pono o nā kuleana hoʻoholo moakāka loa; a

NO LAILA, E HOʻOHOLO HOU ʻIA e hoʻouna aku ka Luna Hōʻoia Mokuʻāina i ka palapala hōʻike o ka hopena o ka hōʻoia kūhelu ʻana, me kona mau manaʻo hoʻoikaika, a me nā ʻōlelo hoʻoholo inā ua loaʻa, i ka ʻAha ʻŌlelo Hawaiʻi he 20 lā, ma ka lohi loa, ma mua o ka wehena o ke Kau Mau o ka ʻAhaʻōlelo 2020; a

NO LAILA, E HOʻOHOLO HOU ʻIA e ho‘ouna ‘ia aku nēia ‘ōlelo ho‘oholo i ka Hawaiʻi State Auditor, Pelekikena David Lassner – University of Hawaiʻi System, Kenekoa Kaialiʻi Kahele, Pelekikena – ʻAha Hui Siwila ʻo Ke Aloha ʻĀina, pēia pū me ke Kiaʻāina o ka Mokuʻāina ʻo Hawaiʻi, ka Luna Ho‘omalu o Ka ‘Aha Kenekoa Hawai‘i, ka Luna Ho‘omalu o ka Hale o Nā Luna Maka‘āinana o Hawai‘i, ka Luna Ho‘omalu o ke Kōmike Kuleana Hawai‘i o ka ‘Aha Kenekoa Hawai‘i, ka Luna Ho‘omalu o ke Kōmike Kuleana Hawai‘i o ka Hale o Nā Luna Maka‘āinana o Hawai‘i, ka Luna Ho ‘omalu o Ka Papa Kahu Waiwai o ke Keʻena Kuleana Hawaiʻi, a nā Meia o nā Kalana o Hawai‘i.

The undersigned hereby certifies that the foregoing Resolution was duly adopted in the malama of Welehu and the rising of ‘Olepau on the 17^th day of November 2018, at the 59th Annual Convention of the Association of Hawaiian Civic Clubs in Kalapaki, Kaua‘i.

Annelle C. Amaral, President