ASSOCIATION OF
HAWAIIAN CIVIC CLUBS
A RESOLUTION
No. 2018 – 22
E PAIPAI I KA ʻAHA ʻŌLELO MOKUʻĀINA O HAWAIʻI E NOI I KA PAPA O NĀ KAHU KULA O KE KULANUI O HAWAIʻI E HOʻOLOLI I KA INOA O KA “UNIVERSITY OF HAWAIʻI INSTITUTE FOR ASTRONOMY” A I KA “PAUL HENRY IKAIKA COLEMAN ASTRONOMY CENTER”
ʻOIAI, ʻo Paul Henry Ikaika Coleman ke kauka Hawaiʻi mua loa i paʻa iā ia ka palapala Laeʻula ma ka astrophysics i laha ma ka lehulehu; a
ʻOIAI, ua kālele kāna noiʻi papahana kauka ma ka nui o nā wiliau hōkū i kālailai ʻia ma nā kukuna lēkiō, a me ka hoʻohana ʻana i ua ʻikepili lā no ke kuhi ʻana i nā kinona o nā kino ma ka ʻōnaeao; a
ʻOIAI, ua holo nui ʻo Dr. Coleman a puni ka honua no ka hana ma kona ʻoihana koho, i hōʻea ʻo ia ma kekahi mau wahi hoʻonaʻauao e laʻa aku me ka Virginia Polytechnic Institute and State University, Kapteyn Astronomical Institute ma ka ʻāina Nekelaka, New Mexico Institute of Mining and Technology, Yale University, a me ka University of Puerto Rico; a
ʻOIAI, ma ka makahiki 2002, ua komo ʻo Dr. Coleman he limahana o ka University of Hawai‘i Institute for Astronomy (IFA); a
ʻOIAI, ma nā makahiki he 16 āna i hana ai ma ka Institute for Astronomy, ua lilo ʻo Dr. Coleman he mea nui ma ka hoʻonaʻauao ma IFA a me ka hoʻopili ʻana i ko ke kaiāulu i ka hana a IFA ma o ka haʻi ʻōlelo ʻana no ke koʻikoʻi o ka hana kilohōkū iā Hawaiʻi nei, i ka mōʻaukala o ka hoʻokele waʻa Hawaiʻi kahiko, a no ke ala e alakaʻi ai ʻo Hawaiʻi ma ka ʻoihana kilohōkū a puni ka honua; a
ʻOIAI, ua noho ʻo Dr. Coleman ma nā kōmike a ʻaha kūkā he nui no ka hoʻonui ʻana i ke komo a ka Hawaiʻi ma ka hoʻonaʻauao a me ke komo ʻana i nā ʻoihana ʻepekema; a
ʻOIAI, he hoa paipai kuʻupau ʻo Dr. Coleman no ka ʻoihana kilohōkū ma Hawaiʻi nei a me ka UH Institute for Astronomy ma ke kaiāulu ma nā hui like ʻole e like me nā hui holo, nā hui ʻoihana, a me nā hui ʻoihana kālepa a puni ka moku ʻāina; a
ʻOIAI, ua makemake nui ʻo Dr. Coleman i ke komo o ka Hawaiʻi ma nā ʻoihana ʻepekema e like ke kilohōkū i pili ka mōʻaukala waiwai a ka Hawaiʻi me ke ala kilohōkū no kēia mua aku; a
ʻOIAI, ua alakaʻi ʻo Dr. Coleman i ka “Research Experiences for Undergraduates Program” e kaʻa ana ma lalo o ka “National Science Foundation” no nā makahiki i ʻaneʻane piha he ʻumi, e hoʻonohonoho ana i nā haumāna mai nā wahi like ʻole o ʻAmelika Hui Pū ʻIa no ka noho huʻeaʻo ʻana me nā mea ʻepekema maiā IFA no ke kauwela; a
ʻOIAI, ua lilo ʻo Dr. Coleman he alakaʻi a he aʻoaʻo no ka hanauna hou o nā mea ʻepekema ʻōiwi Hawaiʻi a ʻoiai he lua ʻole kona kūpaʻa kuʻupau no ka pono o ka Lāhui Hawaiʻi, keu aku no nā ʻōpiopio hoihoi i ke komo ma nā ʻepekema, nā ʻenehana, nā hana wilikī, a me ka makemakika; a
ʻOIAI, he lālā ʻo Dr. Coleman ma ke kōmike lekikona Hawaiʻi o ka moku ʻāina; a
ʻOIAI, ua hala ʻo Dr. Coleman ma ka lā 16, o Ianuali 2018, ma kona makahiki 62 o ke ola honua nei, e waiho ana i nā hua hana he nui ma ke au kilohōkū a ma ke kaiāulu ʻōiwi Hawaiʻi ma Hawaiʻi nei a, a puni ka honua.
NO LAILA, E HO‘OHOLO ‘IA E ka ‘Ahahui Sīwila Hawai‘i e ākoakoa nei ma kona ‘Aha Nui 59 ma Kalapaki, Kauaʻi, ma ka malama ʻo Welehu me ka piʻina ʻo ʻOlepau, ma ka lā 17 o Nowemapa 2018, e paipai i ke ʻAhaʻōlelo Moku ʻĀina o Hawaiʻi e noi i ka Papa O Nā Kahu Kula O Ke Kulanui O Hawaiʻi e hoʻololi i ka inoa o ka “University of Hawaiʻi Institute for Astronomy” a i ka “Paul Henry Ikaika Coleman Astronomy Center”; a
NO LAILA, E HOʻOHOLO HOU ʻIA e ho‘ouna ‘ia aku nēia ‘ōlelo ho‘oholo i ka Pelekikena-ʻAhahui Siwila ʻo Ke Aloha ʻĀina, ka ʻohana o Paul H.I. Coleman, ka UH Institute for Astronomy, Kenekoa Kaialiʻi Kahele, a me ka Luna Hoʻokele-ʻImiloa Astronomy Center, pēia pū me ke Kiaʻāina o ka Mokuʻāina ʻo Hawaiʻi, ka Luna Ho‘omalu o Ka ‘Aha Kenekoa Hawai‘i, ka Luna Ho‘omalu o ka Hale o Nā Luna Maka‘āinana o Hawai‘i, ka Luna Ho‘omalu o ke Kōmike Kuleana Hawai‘i o ka ‘Aha Kenekoa Hawai‘i, ka Luna Ho‘omalu o ke Kōmike Kuleana Hawai‘i o ka Hale o Nā Luna Maka‘āinana o Hawai‘i, ka Luna Ho ‘omalu o Ka Papa Kahu Waiwai o ke Keʻena Kuleana Hawaiʻi, a nā Meia o nā Kalana o Hawai‘i.
The undersigned hereby certifies that the foregoing Resolution was duly adopted in the malama of Welehu and the rising of ‘Olepau on the 17th day of November 2018, at the 59th Annual Convention of the Association of Hawaiian Civic Clubs in Kalapaki, Kaua‘i.
Annelle C. Amaral, President